Archive for Agustus 14, 2008

14 Agustus 2008

Langsung aje ye. Tadi siang mohon maap, ane lagi-lagi nangkringin tayangan kuliner Trans TV. Kali enni nyang disorot tentang Mie Merah Putih di satu warung di Betawi. Tepatnye di daerah Jl. Kartini. Nyang punya sekaligus nyang jadi juru masaknye orang Cina. Emang sayang juga sih, kagak ade informasi, makanannye halal ape kagak.

Nyang unik, sesuai namenye, mie merah putih… emang diye bilang dalam rangke HUT Kemerdekaan RI juga, ibarat kate bendera merah putih. Mie jadi berwarna merah putih belang gitu. Naaa….nyang enni niii, bagian merah nye emang berwarna merah. Katenye kagak pake pewarna buatan atau bahan laen nyang berbahaye untuk manusia, ibaratnye dijamin aman dah. Diye ngomong begitu karena nyang bikin mie diye sendiri. Setiap ari diye produksi sendiri. Mie punye tekstur lebih gede daripade mie biase en katenye lebih lembut gitu.

Cara ngebuat mie nyang bagian berwarne merah dikasih tau ame si engkoh nyang punye en jadi juru masaknye. Ternyate bahan pe “merah” nye dari buah bit nyang emang berwarne merah tua. Buah bit di blender setelah dicampur garem secukupnye. Udeh gitu, blenderan buah bit tadi dituang ke adonan tepung bahan baku mie. Diulek-ulek dan setelah menyatu warna merah nye ame adonan tepung, dimasukin ke alat pembuat mie dalam bentuk lempengan gitu. Tiap lembar lempengan mie merah dilapis ke atas lembar lempengan mie putih en dimasukin lagi ke alat pembuat mie lempengan tadi. Setelah jadi lempengan campuran warna merah bagian atas mie en putih di bagian bawah mie, terakhir dipotong-potong sebesar mie kering dengan dimensi terserah si engkoh. Taarrraaaa……jadi deh mie warna merah putih. Tinggal dikukus di kuah, jadi dah Bakmi Merah Putih siap disantap en mantap.

Iklan

Comments (2) »

13 Agustus 2008

Assalamualaikum…. selamat berjumpa. Empat hari lagi udeh hari kemerdekaan kite. Dirgahayu RI ye!

Kali enni ane mau ceritain hasil nonton kite, lagi-lagi tayangan di Trans TV…. nyang entu tuh, tayangan tentang kuliner seudehnye acara berita Jelang Siang. Nyang ngebawain acarenye si botoh nyang cakep nan aduhai, Mbak Susan Bachtiar… kedemenan ane juga sii, Ehem…

Ceritenye culinary about Ikan Pari Panggang/Bakar, yang konon jenisnye ade lebih dari 200 macem. Maksudnye jenis ikan pari nye. Jenis yang dibuat makanan adalah jenis nyang bisa dimakan. Eit, ente tau kan Ikan Pari? Ikan nyang punya sayap gede, kalau diye berenang, sayapnye kayak terbang mengalun gitu. Naa nyang diolah adalah bagian sayapnye, katenye kalo bagian badannye tuh banyak tulang jadi kagak enak kalo diemmut…eh dimakan.

Seudehnye dipotong-potong itu bagian sayap Ikan Pari, dimasukin aer di baskom en dikasih jeruk nipis, biar kagak amis kali. Terus bumbu-bumbu dapur ame wijen di adon en digoreng dulu. Ikan pari dipanggang dilapis ame daun. Lapisan daun tujuannye supaye bisa menampung campuran adonan bumbu dapur nyang udeh digoreng tadi terus dilumurin ke “body” ikan pari nyang lagi di panggang.

Wuaaah….kalo udeh mateng dipanggang disajikan di piring ame daun pelapisnye tadi. kao ngeliat nyang pade nyicipin en makannye…..hhhmmmmmm, numero uno…yuummmmy. Ape lagi si rumah makan entu nambahin sambel buat dicocol ame ikan pari panggang tadi….uuuuuh, siiip banget dah.

Ade juga menu lain dari ikan pari nyang dipotong-potong tadi digoreng en dicampur ame bumbu dapur terus dikombinasi gorengannye……naaah, katenye rasenye sedeeeep, gurih en garing buanget (karena digoreng). Cobain deh.

Comments (2) »