Pasar Romadhon Jl. Soka Rawa Badak Koja

Bang Wiskul abis nganter penumpang bajaj nye sampe ke daerah Tanjung Priok. Secara penumpangnye turun, bang wiskul ngider” sampe Rawa Badak di daerah Koja. Doi pengen banget ngeliat aktifitas pasar romadhon di daerah sono.
Selama bulan ramadhan emang di Jakarta biasa deh tuh menjamur pusat jajanan ringan buat buka puasa. Buat orang nyari takjil. Takjil di Pasar Romadhon. Contohnye ajeh di daerah Koja Jakarta sebelah Utara nech. Nyang ngetop di Jalan Soka Kelurahan Rawa Badak Utara. Saban ramadhan jalan entu kagak pernah sepi dari aneka makanan buat takjil buka puasa.
Kata orang” Koja, mah, nyang ngejajain lebih dari 150 lapak. Konon, omzetnye bisa sampe Rp 1 juta/hari. Festival Bazar Jl. Soka namanye. Kata temen bang wiskul sesama sopir bajaj nyang mukim disini, hidangan macem” makanan buat buka puasa ini dibuat ame Karang Taruna RW 06, Kelurahan Rawabadak Utara, Kecamatan Koja, Jakarta Utara. Setiap pedagang disini bayar retribusi antara Rp 3.000-Rp 5.000 sehari.
Pasar Ramadhan entu kagak cuman disukain warga sekitarannye ajeh, tiap sore di bulan Ramadhan ini pengnjung nyang dateng juga dari karyawan nyang gawe di kawasan KBN Cakung-Cilincing, juga pegawai” Pemerintah Kota Jakarta Utara.
Tanya ajeh ame Bang Abdul Kadir, karyawan swasta umuran 31 taon nyang ngaku tiap tahun kagak pernah absen belanje takjil buka puasa di Pasar Ramadhan Jalan Soka ini. Alasan doi hargenye lebih murah en banyak pilihannye. “Di sini harga relatif murah, banyak pilihan en rasenye cocok ame lidah gue,” katenye nyang di sore nyang cerah entu beli Gudeg komplit, kolak, en bubur kampiun.
Bang Asnawi, pedagang ikan bakar disini bilang, sehari ajeh doi berhasil jual ikan gurame en bawal bakar antara 25-40 kilogram. Satu ekor ikan gurame bakar dijual seharga Rp 22 ribu en satu ekor ikan bawal seharga Rp 6.000. “Rata-rata sehari palingan yang kagaak habis cuman 1 sampe 2 japit ajeh, nyang 1 japit berisi 2 ikan ukuran sedang,” kata bang asnawi nyang ngikutin trus bazar ini tiap taon.
Kebetulan ada tv lokal nyang wawancara di lokasi pasar romadhon ini. Presenternye nyang bohay cantik ayu…deeeuuuu…. wawancara ame Ketua RW didampingin ame Panitia Pelaksana dari Karang Taruna, en bilang kalo pasar ramadhan Jl. Soka ini udah berlangsung tiap tahun. Pesertanya juga meningkat dari awalnye 100 stan sampe jadi lebih dari 150 stan.
“Sebenarnya banyak pedagang nyang mau ikut tapi ditolak sebab kondisi lahan nyang terbatas cuma 500 meter doang, sepanjang Jalan Soka ajah. Tapi nyang lebih diutamain warga Koja, khususnya Kelurahan Rawabadak Utara nyang mau jualan,” kata Pak RW. Para pedagang cuman dipungut biaya retribusi Rp 3.000-Rp 5.000, biaya entu buat kebersihan dan keamanan.
Laen cerita lagi mpok Nining nyang seumuran 27 tahun, warga Tugu Utara ini lebih seneng jualan es blewah, kolak, biji salak, en gorengan. Daripade lauk pauk en alasannye harga bisa lebih murah en banyak peminatnya. “Kalo jual gorengan kan cuman seribu dapat 3, kolak en blewahnya cuma 5 ribuan, murah lebih gampang jualnye,” kate mpok Nining. Ia mengaku, telah berjualan selama 4 tahun di pasar Ramadhan Jalan Soka tersebut, tahun lalu ia memperoleh omset Rp 1 juta setiap hari.
Makin ngedeketin waktu berbuka puasa, pasar Ramadhan Festival Bazar Jalan Soka mangkin rame. Jadi deh macet di Jalan Alur Laut, sementare kelihatan 5 petugas Linmas berusaha ngatur arus lalu-lintas supaya jalanan kagak begitu macet, tapi sekadar jalan merayap ajeh!!

1 Response so far »

  1. 1

    Naip said,

    Deeuu… Si abang kite merambah ke Koja Jakut yee… Hehehe


Comment RSS

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: