Bedah Kopi: Ginseng Coffee CNI sachet


Baruuuuu ajeh Bang Wiskul markir bajaj nye….  Eeeiiitttss….  Sebenernye sech…  Bukan markir dalem arti nyang sebenernye…  Tapi minggirin bajaj nye di pinggiran gang depan rumah kontrakannye doi di bilangan Kampung Melayu Besar, Tebet. Di daerah belakangnye At-Tahiriyah. Maksud ati mau ngaso dulu barang sebentaran….  Maklum, cuace Jakarte rada-rada panas terik begini. Biar kate udeh mulai sore menjelang maghrib begini nih, sinarnye bisa bikin gosong juga dah.

Sekonyong-konyong ajeh, Mpok Ningsih, bininye Bang Wiskul keluar dari pintu depan nyamperin doi. Sambil nenteng-nenteng bungkusan berwarne emas mengkilap. Doi melongo ajeh merhatiin bokinnye nyang ngedatengin doi sambil mikir dalem hati…  Ada apaan nech, bini gue si Ningsih terbirit-birit begini nech. Ternyate, Mpok Ningsih tersayang…  Pengen ngeliatin lakinye tercinte bahwa doi barusan dari supermarket di jalan Bukit Duri Tanjakan deket rumahnye. Ngebeliin Bang Wiskul kedoyanannye buat ngaso di rumah. Apelagi kedoyanan Bang Wiskul, kalo bukan kupi….  Buat nemenin makan ruti dah…  Hehehe.

Kali ini bukan kupi sembarang kupi…Choi! Namenye: Ginseng Coffee. Mpok Ningsih pengen nyenengin lakinye nyang doyan banget ngupi. Biar ade variasi, doi beliin kopi nyang sachet-an. Produknye juga bukan nyang sembarangan nih, Cing. Dari produk CNI.
Bukan maen senengnye Bang Wiskul dapet sambutan nyang meriah dari bininye tercinta. Semacem suprise lah, begitu…

Bungkus Besar

Begitu serah terima bungkusannye nyang warnanye keemasan mengkilap en terkesan mewah, Bang Wiskul langsung ngederedek di dalem ati: “Pantesan ajeh bini gue si Ningsih ngebeliin kopi sachet ini, soalnye bungkusnye kalo kate orang mah…. eye catching.”  Entu tuh, nyang kalo ngeliat di tumpukan pajangan kopi-kopi sachet di super market, bungkus ini nyang paling keliatan dah!

Di sisi depan bungkus entu, ada gambar secangkir kopi susu panas ame keliatan kepulan asep. Trus keliatan taburan bijih kopi di sekitaran piring cangkirnye. Di piring entu ada sejumput akar ginseng. Gambaran ini mah, kasih kesan nikmatnye minum kopi.

Sayangnye, gara-gara mau ngasih liat kesan mewah di bungkusnye entu, warne dasar atawa background warne dari entu gambar secangkir kopi tadi dipilihnye warna merah tua, nyang kurang matching. Tekstur warne ini emang jadi warne kebesaran Tiongkok kuno en dominan jadi warne latar gambar en logo di bungkus sisi depannye. Kayaknye sech mau menyelaraskan ame warne bagian atas tulisan CNI di logo CNI. Trus juga di logo 25 tahun CNI. Tapi nyang ada, jadinye muncul kesan “bermuram durja” gara-gara warna nyang rada-rada gelap kelam temaram gituh….

Anyway, berbagai info penting tentang kopi ginseng di dalem sachet entu ada semua di sisi belakang bungkus gedenye.

Sachets

Gambar en info nyang nyaris sama ada juga muncul di sachet nye entu.

Kontan ajeh, Bang Wiskul buru-buru ke dalem rumah, secara pengen nyobain entu kopi nyang dibeliin bini tercintenye!…..   Emang udeh jadi kebiasaan Bang Wiskul, kalo ngebikin kopi, doi biasa ngeracik sendiri, termasuk nyeduh ke air panasnye juga. Racikan bisa terdiri dari komposisi bubuk kopi ame gula berjenis sweetener produk Tropicana Slim. Nyang warna bungkusnye dominan kuning terang.

Emang Bang Wiskul minum nyang manis-manis sekarang campuran gulanye pake jenis nyang gula jagung entu. Maklum, selain faktor umur juga buat jaga-jaga ajeh, katenye. Sekali-kali Bang Wiskul nambahin creamer biar kagak bosen. Bisa dari jenis bubuk coffee mate nyang non dairy creamer atawa bisa juga sesekali pake susu manis kentel kalengan.

Naaaah….   Kali ini Bang Wiskul mau nyobain, atau istilahnye mau nge-wiskul, atawa bedah minuman kopi nyang namanye Ginseng Kopi CNI entu. CNI kepanjangan dari nama produsennye, PT Citra Nusa Insan Cemerlang di Jakarta. Sebelon Bang Wiskul nyobain entu kopi, doi nyetel sound system nye dulu, mengalunlah musik JAZZ standard “berat.” Entu lagu JAZZ judulnye Take The A Train, dimaenin oleh Dizzy Gillespie Trio ala genre JAZZ aliran mainstream. Aaaah…   Bang Wiskul jadi inget begadang di Java JAZZ Festival kemaren 2-4 Maret 2012 di PRJ Kemayoran buat nonton en ngelonin show JAZZer kelas dunia…..

Okay, kembali ke laptop kite…. Doi nyobek sachet nyang diambil dari daleman bungkus gedenye entu. Samar-samar lagu instrument JAZZ berjudul Take The A Train masih mengalun sayup-sayup. En langsung bubuk dari isi sachet entu doi tuang ke cangkir khusus ngopi Bang Wiskul nyang tranparan entu.
Emang secara visual kentara banget warna ame gradasi bubuknye, bisa jadi nandain perbandingan kopi, gula en creamer nye.

Nah kalo bubuk kopi ginseng ini emang sepadan banget perbandingan antara kopi, gula en creamernye. Ada kesan visual juga sech, bubuk creamernye lebih dominan dibanding gulanye. Secara bubuk kopi lebih sedikit perbandingannye ame bubuk gulanye.

Kesimpulan umum sebelum minuman siap ditenggak, bubuknye punya gradasi en tekstur nyang keliatan banget kasih kesan minuman ini campuran kopi susu manis…  Begitu….

Trus Bang Wiskul mulai nuangin air panas dari termos di dapurnye ke cangkir transparan tadi. Kire-kire temperatur air nyang udeh dimasak ame bininye Bang Wiskul sekitaran 90 derajat Celcius. Air nyang dituang kira-kira 150 cc dah! Langsung doi ngaduk-ngaduk entu cangkir pake sendok kecilnye biar bubuk kopinye ngelarut menyatu ame airnye. Selesei diaduk kentara banget larutannye jadi berwarne coklat susu. En kesan dominan warna gelapnye larutan kopi ame kentelnye larutan susu.
Lebih mengesankan lagi sebagai kopi tarik, soalnye keliat ada busa mengambang di permukaan larutan. Kesannye sech, fresh! Buat dijadiin wedang kopi sore-sore…..  Hehehe.

Sekarang giliran masuk ke ajang ujicoba atawa ajang icip-icip nech. Dengan konsentrasi penuh ame perasaan nyang fokus, Bang Wiskul nyoba menghirup entu larutan wedang kopi, hmmmmm….   Boljug nech…  Boleh juga nech…  Enak sech enak juga nech…

Di mulut lebih banyak rasa creamy nye plus ada rasa-rasa karamel gituh. Ada juga pahit-pahit nye sedikit, bisa jadi karena ada campuran ginseng nye nech. Rasa kopinye nyaris ilang. Rasa manisnye juga tenggelam. Manis-manis plain atawa manis ringan gituh.  Prakiraan komposisi perbandingan campuran bubuknye sech antara kopi:susu:karamel:ginseng:gula =  4:8:4:2:3.
Trus kalo diteguk, perut langsung kerasa kembung begitu. Bisa jadi karena Bang Wiskul mengidap sakit maag jenis GERD, entu tuh kepanjangan Gastro Esophageal Reflux Disease, sejenis maag nyang bisa bikin perut kembung bahkan nyeri di dada sampe kagak bisa napas….ups…!!

Emang sech, kalo ada kesan rasa kenyang diperut gituh, bagus juga buat nyang diet nech….   Tapinye buat nyang takut gemuk juga timbul was-was. Jangan-jangan kalo keseringan minum ini kopi bisa bikin gemuk.

Abis nyobain ini kopi ginseng, sekarang giliran Bang Wiskul merhatiin keseriusan produsennye nech. Nyang namanye PT Sukses Abadi Farmindo – Tangerang, dalem produksi ini kopi. Kentara banget, si produsen ini serius buat bikin ini kopi. Keliatan dari kemasannye nyang berbentuk bungkus gede ini, termasuk kemasan sachet didalemnye. Dari warna keemasan bungkus en sachet, berbagai info penting, logo CNI, ade lagi logo “25 tahun Enrich your life with CNI.”
Adanye penampakan gambar secangkir kopi susu hangat ada kepulan asep en ada sejumput ginseng diantara taburan bijih kopi. Info net weight: 20 sachets X 20 gram (0.7 oz). Ada nomor MD ijin BPOM RI.


Ada label halal dari MUI.  Ini jadi penting, soalnye jaman sekarang ada jenis kopi nyang diproduksi indikasinye kagak halal, apelagi MUI kagak mau ngerekomendasiin.
Ada logo top brand 2011 dari majalah Marketing en Frontier Consulting Group. Ini nandain produknye menjadi merek kopi nyang top versi majalah bergengsi. Ehemmmm…..
Dari komposisi ingredients nye kite bisa tau, pantesan rasa kopinye ilang, soalnye ketutup ame ekstrak ginseng en non dairy creamer nyang mengandung color agent betacarotene. Ditambah lagi anticaking agent nye en sodium nyang bisa jadi rada-rada pahit. Lagian, gula nyang dipake mungkin sedikit ajeh.
Segale macem info dibagian belakang bungkus gede ini bisa buat referensi kite menakar komposisi air en bubuknye yang pas. Termasuk nge-check doi punye website en alamat or telepon nyang bisa dihubungi dari produsennye entu.
Dari nutrition facts nye, emang sech total energy 80 kkal, bandingin ajeh ame AKG (Angka Kecukupan Gizi) orang dewasa standard nyang umumnye 2.000 kkal. Trus energy from fat 0 kkal, tertera total fat 0 gram atawa 0%, protein 2% en total carbohydrate 6%, emang kagak ada efeknye kalo prosentase sekecil entu buat ngegemukin badan kite. Gula nye 16 gram, termasuk banyak nech perbandingannye, berlawanan ama kesan rasanye nyang rada pahit atawa kurang manis.  Ada sodium 1%, ini nyang menambah pahit rasanye.
Kalo bentuk bungkusnye sech disiapin buat isi banyak, sistemnye doi pake nyang bisa ngembang didasar bungkus gedenye entu. Sekaligus praktis buat supaya bungkusnye bisa didiriin vertikal gituh.

Boleh jadi kesimpulannye buat Bang Wiskul mah, ini kopi enak buat anak muda nyang suka nongkrong di 7 Eleven atawa di cafe-cafe nyang kedoyanannye sebangse kopinye Starbucks lah. Ingetannye kopi susu nyang ada busa sedikit en nyang mengandung creamer susu nye begitu berlimpah gitu. Atawa buat nyang bukan pecandu kopi, yaaaahh…. cuman sekedar iseng ngopi doang, mah… cocok nech minum kopi (susu) ginseng ini. Yummy dah!!

Tapi buat coffee lovers mah, rad-rada kurang dah. Apelagi nyang mengaku “kopitubruk-mania”…. hehehe…. bisa-bisa dibilang, ini kopi buat anak-anak nyang baru belajar ngupi nech….

Okay…  Dengan seleseinye lagunye om Dizzy Gillespie dari album trio nye. Nyang bawain instrument JAZZ standard berjudul Take The A Train. Nyang mengalun dari sound system nye Bang Wiskul. Berakhir jualah kisah kasih asmara….  Lhoh….  Lhoh….  Bukannnnn….  Melainkan cerita wiskul minuman dari genre kopi ini….   Dari Bang Wiskul, nyang Betawi asli. Sampe ketemu di kisah wiskul nyang laen yeee…..

7 Tanggapan so far »

  1. 1

    elektro7 said,

    ngupi pagi2 mantabb Om

  2. 2

    elektro7 said,

    mantabb…….ngupi pagi-pagi Om……

  3. 3

    belbel said,

    Mantapp dah bang. Ada campuran antara betawi ama musik Jazz.

  4. 4

    belbel said,

    Mantapp dah bang. Pake dicampur cerita musik Jazz yaa. Asyik juga nech.

  5. 5

    irfansyah7 said,

    allright, Man! have a nice day, friend.

  6. 6

    naive7 said,

    Wahh ada Mas Wiskul lagi nih. Udah online lagi ya Mas. Selamat jumpa di cyber lagi.
    http://rt008.wordpress.com
    YULIANSYAH

  7. 7

    gadis7 said,

    deeee bang wiskul ada-ada ajah…..sekarang ngewiskulnya minuman kopi yah…….
    (gadis – tetangga dekat, http://gadis7.wordpress.com)


Comment RSS

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: